Gizartea -
Jazoera
Bi pertsona atxilotu dituzte Barakaldon, 42 autori kalteak egiteagatik
Atxilotuetako bat adingabea da. Gertatutakoaren aurrean, akusazio publiko gisa aurkeztuko dela jakinarazi du Barakaldoko Udalak.
Agentziak | Erredakzioa
Barakaldoko Udaltzaingoak bi pertsona atxilotu ditu goizaldean, horietako bat adingabea, ekintza bandalikoak egitea leporatuta, ustez Murrieta kalean zeuden 42 ibilgailuri kalteak egin baitizkiete, Udalak jakinarazi duenez.
Ohar berean jasotzen denez, Udala akusazio partikular gisa aurkeztuko da, erantzukizunak eskatzeko "eta egileengan legearen indar guztia erori dadin".
Goizaldean, 04:45 aldera, Barakaldoko Udaltzaingoak abisu bat jaso du, bi gazte Murrieta kalean aparkatuta zeuden autoetan kalteak eragiten ari zirela jakinarazteko. Lekukoek emandako deskripzioei esker, agenteek Sestaoko bi bizilagun atxilotu dituzte. Poliziak ikerketa abiatu du, inguru horretan konorterik gabe aurkitu eta Gurutzetako Ospitalera eraman duten hirugarren pertsona batek horiekin zerikusia ote duen.
Guztira, 42 ibilgailu kaltetu dira: kristalak eta atzerako ispiluak apurtuta zituzten, eta kapotak eta sabaiak, mailatuta.