Irala auzoaren mendeurrena ospatzeko jarduera ugari antolatu dituzte

Azaro eta abenduan zehar, Bilboko Iralabarri auzoaren mendeurrena ospatzeko jarduera ezberdinak antolatu dituzte auzokideek.

Ostiral honetatik hasita, Iralabarri auzoaren bilakaerari buruzko ikuspegia eskaintzen duen erakusketa bisitatzeko aukera egongo da, Kirikiño etorbideko plazan, abenduaren 18ra arte. Erakusketa hori hamabi panelek osatzen dute eta Bilbao Izan programaren barruan sartzen da.

Antzinako argazkien, prentsako aipamenen eta material dokumental anitzaren bitartez, Bilboko gune berezi horren historia erakusten du erakusketa horrek, auzo bitxi hori sortu zenetik gaur egunera arte. Izan ere, XX. mendearen hasieran, Juan Jose Irala industria gizonak Harino Panadera lantegia eraiki zuen, eta garai hartako asmo handiko hirigintza proiektua jarri zuen martxan.

“Iralabarri: auzo baten bizitzan, mendeurrena” izena duen erakusketak Iralabarri auzoaren panoramika eskaintzen du. Erakusketa horrek, auzoaren jatorriari, eraikin zein etxebizitza motari, elkarte mugimenduei eta auzoaren hirigintza eta arkitektura berezitasunei buruzko irudi eta azalpen testuak biltzen dituzten tamaina handiko hamabi panel ditu.

Iralabarri auzoaren mendeurrena ospatzeko egitarauaren barruan, hitzaldiak, kontzertuak eta bisita gidatuak jasotzen dira ere. Ildo horretatik, Harino Panaderaren eraikinera bisita gidatuak egingo dituzte. Ekimena doakoa da, baina beharrezkoa izango da aurretik izena ematea 94 401 00 10 telefono zenbakira deituz. Gainera, gazteei zuzendutako jarduerak antolatu dituzte, hala nola, kalejirak edota ginkanak.

Beste alde batetik, Victor Urrutia Hiri Soziologian katedradunak auzo horretako hirigintza prozesuari buruzko hitzaldia emango du. Urrutiak azaldu duenez, auzo horretan salgai zeuden etxeak nahiko eskuragarriak ziren eta klase ertaineko familia askok horiek erosteko dirua zuten.

Bilbao Izan programa duela hamahiru urte sortu zen, Bilboko biztanleei eta interesa duten guztiei hiriaren historia eta bilakaera ezagutarazteko.