Bi gizon atxilotuta bikotekideei erasotzeagatik Bilbon eta Santurtzin

Ertzaintzak bi gizon atxilotu zituzten atzo, genero indarkeriaren delitu bana egin izana egotzita Bilbon eta Santurtzin.

Atzo, larunbata, 11:30ak aldera, Ertzaintzaren agenteek emakumezko batekin topo egin zuten Bilboko Gorte kalean eta, hark jakinarazi zienez, bikotekideak eraso egin zion eztabaida bat izan ostean.

Erasotzailea handik gertu zebilen eta atxilotu egin zuten. Biktima Basurtuko Ospitalera eraman zuten, lesioak bertan artatzeko. Atxilotua (44 urteko gizon bat) epailearen esku geratu zen atzo bertan. Atzo 19:30ak jota zirela, ospitale batetik Ertzaintza bertaratzeko eskatu zuten, bikotekidearen erasoak jasan zituen emakume bat artatzen ari baitziren. Ospitalera joan ziren agenteek biktima Muskizko ertzain-etxera eraman zuten, beharrezko salaketa jar zezan.

Dirudienez, gertakaria bikotea bizi den etxean, Santurtzin, jazo zen eta, salatzaileak adierazi zuenez, askotan jasaten zituen bikotekidearen tratu txarrak. Atxilotua (41 urteko gizon bat) epailearen esku geratu da gaur goizean. Genero indarkeriaren biktima diren emakumeei laguntzeko telefono zerbitzua: 900 840 111 - 016