Gizartea -
Bizkaia
Pertsona bat hil da Zallako etxebizitza batean izandako sutean
Sua goizaldean piztu da Llana auzoan. Eako pabiloi batean beste sute bat egon da; garrek erabat kiskali dute.
EITB.EUS
Pertsona bat hil da goizaldean Zallan (Bizkaia) Llana auzoko etxebizitza batean izandako sutean, Segurtasun Sailak jakinarazi duenez.
Sua 00:55ean piztu da Llana auzoko etxebizitza batean. Bizkaiko Suhiltzaileen zazpi kamioi joan dira sutea itzaltzera, eta gorpu bat topatu dute etxebizitza barruan.
Identifikazio lanak amaitu ez badira ere, litekeena da hildakoa etxean bizi zen emakumea izatea.
Sutea Ean
Horrez gain, beste sute bat izan da goizaldean Bizkaian, kasu honetan Ean. Olagorta auzoko pabiloi batean, egur lantegi batean, piztu dira garrak.
Suak erabat txikitu du lantegia, eta erortzeko zorian dago.
Nekazal turismoko etxe baten ondoan dago enpresa, baina zorionez ez zegoen inor barruan sutea gertatu denean.
Kalte material handiak daude enpresan. Suhiltzaileek 08:30erako hartu dute kontrolpean sutea, baina oraindik ez dute amatatu.
