Gobernuak ez du EBren araudia hizkuntza koofizialetara itzultzen

Gobernu zentralak ez du bere konpromisoa bete, izan ere, EBren araudia hizkuntza koofizialetara itzultzea adostu zuen Europako erakundeekin, katalanaren, euskararen eta galizieraren erabilera Europar Batasunean sustatzeko, Jerzy Buzek Europako Parlamentuko presidenteak adierazi duenez. Gai horri buruz galdetu dio Buzeki Oriol Junqueras ERCko eurodiputatuak.

Europako Ganberak eta Espainiak 2006an sinatutako akordioaren arabera, Europako Parlamentuaren webguneak link bat izan behar zuen EBren araudi osoa hizkuntza koofizialetan ikusgai izateko. Araudia itzultzeko ardura Espainiako Gobernuak zuen, baita atari ofizial batean argitaratzeko eta Parlamentuari esteka jakinarazteko ardura ere.

Akordioaren arabera, herritarrek Parlamentuarekin hizkuntza koofizialetan harremanetan jartzeko aukera dute, eta baita erantzuna hizkuntza horietan jasotzeko ere. 2009an 32 eskakizun katalanean jaso zituen Europako Parlamentuak, eta bost 2010ean. Orain arte ez dute gainerako hizkuntza koofizialetan komunikaziorik jaso, Parlamentuko presidenteak azaldu duenez.

Bestalde, osoko bilkuretan edo batzordeetan eurodiputatuek hizkuntza koofizialetan hitz egiteko aukera izatea ukatu du berriro Buzekek.