Abortua 'bermatzeko' lege-proposamena aurkeztu du PSNk

Nafarroako parlamentuko talde sozialistak gaur abortuaren inguruko hainbat egitasmo aurkeztu ditu, besteak beste, Nafarroan emakumeei zerbitzu hori "bermatzeko" lege-proposamena eta profesionalei objektore deklaratzeko aukera.

Egitasmoa azkar eta irakurketa bakarrean tramitatu nahi du PSNk, eta horren arabera, abortuan "zuzenean inplikatutako" profesionalek objektore deklaratzeko edo "egiteko prest" aurkezteko prozesua erregulatuko da. Bi kasuetarako "borondatezko eta konfidentziala" den erregistro bat sortuko da, ezetz esaten dutenentzat ere, eta Nafarroako Osasun Zerbitzuak kudeatuko du zuzenean.

Maria Chivite PSNko exekutibaren bozeramale eta legebiltzarkideak esan duenez, proposamenaren arabera, profesionalek objektore edo prest agertzekotan, zein egoeratan egiten duten zehaztea nahi dute.

Adierazpena idatziz egingo da, zerbitzua ematen den zentroa gidatzen duen pertsonari zuzenduta, eta abortua egin baino 7 egun lehenago aurkeztu beharko da, osasun publikoaren errekurtsoak ordenatu ahal izateko.

Legea betetzen ez duen Gobernu batek "zilegitasuna galdu" duela eta "orain" herritarrei arauak betetzeko eskatu ezin diela azpimarratu ostean, bozeramale sozialistaren arabera, "UPNk bidezkoa ez den egoera inozo bat, eta hipokresiaz beteta dagoena, mantendu nahi du", PSNk, ordea, "irtenbideak" eta "eskubideak nahi ditu".