Gizartea -
Ezbeharra
Gizon bat atxilotu dute Gasteizen mutil bati sexu erasoa egiteagatik
Biktimak adierazi zuenez, erasotzailea ikustez ezagutzen zuen eta etxe-aldaketarekin laguntza eskatu zion.
Erredakzioa
Gasteizeko ertzain etxeko agenteek58 urteko gizon bat atxilotu zuten , atzo arratsaldean, ustezko sexu eraso delitua egotzita. Gizonak ukitu lizunak egin zizkion 18 urteko mutil bati.
16:30ak zirenean Ertzaintzak hiritar baten deia jaso zuen; gizonezko baten erasoa jasan berri zuen eta erasotzailea Gasteizko Alberto Schommer kaleko denda baten zegoela abisatuz.
Bertaratu zirenean, agenteak biktimarekin jarri ziren harremanetan. Gaztea oso urduri zegoen eta agenteei azaldu zien gizon bat sexu erasoa egiten saiatu zitzaiola.
Biktimak adierazi zuenez, erasotzailea ikustez ezagutzen zuen eta etxe-aldaketarekin eta kontratu baten irakurketarekin (ez omen zuen gaztelania ondo ulertzen) laguntza eskatu zion; biktimak baietz esan zion.
Atxilotuaren etxebizitzan zeudenean iztartean ukitu lizunak egiten hasi zitzaion eta mutikoaren frakak jaisten saiatu zen, baina ez zuen lortu. Biktimak orduan indar egin zuen erasotzailearen kontra eta etxetik ihes egitea lortu zuen, berehala Ertzaintzari abisua emanez.
Agenteak ustezko erasotzailea zegoen lokalera bertaratu ziren eta gizona atxilotu zuten, ustezko sexu eraso delitu bat egotzita. Ertzain- etxera eraman zuten eta epailearen esku geratuko da hurrengo orduetan.