Gizartea -
Gipuzkoako errepideak
Kamioiek bidesaria ordaindu beharko dute 2012an N-1 erabiltzeko
Gipuzkoako Foru Aldundiaren ustez, N-1 errepidea da "lehentasuna", baina "atea irekita dago" lurraldeko gaitasun handiko errepide-sareko beste bide batzuetan ere jartzeko.
Erredakzioa
Eneko Goya Gipuzkoako Foru Aldundiko Bide Azpiegituretako Departamentuko foru diputatuaren esanetan, 2012an N-1 errepidean ibilgailu astunentzako bidesaria ezartzea aztertzen ari dira, bide horretan trafikoa erregulatzeko. Horren arabera, N-1 errepidea da "lehentasuna", baina "atea irekita dago" lurraldeko gaitasun handiko errepide-sarearen beste bide batzuetan ere jartzeko.
Goyak gogorarazi duenez, Batzar Nagusiek onartu behar dute arau berria, eta zirriborroa "ez da gauza erraza" baina "publikatzear eta aurkeztear dago", gaineratu du.
Foru diputatuaren ustez, Gipuzkoa "mugaz gaindiko ibilbide batek zeharkatzen du, eta honelako erabakiak hartzeko premia handia du, N-1 errepideko trafikoa erregulatu nahi bada". Halaber, arau berriak "sistema zehatz bat eta teknologia zehatz bat" behar dituela esan du, eta "horrek ere denbora behar du".
Goyaren esanetan, "egun bidesaririk ez duten errepideetan kanon bat jartzeko tipo berri bat" ezarri aurretik "irizpide argiak" behar dira, "Europako araudiarekin bat datozenak eta zeren truke kobratzen den zehazten dutenak".
Arau berriak, diputatuaren iritzian, "trafikoa erregulatzen lagunduko digun tresna izan behar du", eta Gipuzkoako lurraldearen "berezitasunak" izan beharko ditu kontuan.
"Guk proposamen zehatz bat egingo dugu eta, gure inguruko lurraldeek sistema horiek ezartzen aurrera egin ahala, guk ere gure ingurukoen sistema horrekin bat egingo dugu. Alde horretatik, sistema malgua izango da, egin ahal denean egiteko", esan du.