Gizartea -
Istripua
Gazte bat larri zauritu da ezbehar batean, Zornotzan
Istripua BI-3332 errepidean jazo da Muniketako noranzkoan. Zaurituaren ibilgailuak horma baten aurka talka egin du errepidetik atera ostean.
Erredakzioa
Abadiñoko 19 urteko bizilagun bat larri zauritu da gaur eguerdian, bere ibilgailuak horma baten kontra talka egin eta gero, BI-3332 errepidean, Zornotzan (Bizkaia).
Ezbeharra 12:05ean jazo da, BI-3332 errepidean, Zornotzan, Muniketako noranzkoan, Herrizaingo Sailak jakitera eman duenez.
Ikertzen ari diren arrazoiengatik, Audi A3 ibilgailu bat errepidetik atera da, eta horma baten aurka talka egin du "modu ikusgarrian".
Talkaren ondorioz, autoaren gidaria konorterik gabe geratu da ibilgailu barruan.
Larrialdi zerbitzuek istripuaren berri izan eta berehala Osakidetzako anbulantzia bat bidali dute, eta baita Ertzaintzako zenbait patruila ere. Gutxi geroago zauritua Galdakaoko ospitalera eraman dute.