37 pertsona auziperatu dituzte Sabino Aranako protestagatik

Ertzaintzak segurtasun kolektiboaren kontrako delituagatik auziperatu ditu 37 pertsona lan-gatazka baten harira egindako protesta batean parte hartzen ari zirela Sabino Arana Etorbidea itxi eta errepidera olioa botatzeagatik, Herrizaingo Sailak jakinarazi duenez. Izan ere, ekintza horiekin auto-ilara handiak eragin dituzte. Gainera, auziperatuetako bat atxilotu egin dute desobedientzia larria delitua egotzita.

Gaurko 09:10 aldera, Thysenkruup enpresako 37 langile inguru Sabino Arana Etorbideko errepidearen erdian jarri dira enpresaren itxiera salatzeko, eta autoen zirkulazioa eten dute. Ekintza horrek auto-ilara luzeak eragin ditu, Bizkaiko sarrera-irteera nagusia itxi dutelako autoen joan-etorriak oso ugariak diren ordu batean, aipatu iturrien arabera.

Ertzaintzak zehaztu du kaltetutako gidarietako batzuk "autotik jaitsi eta manifestariei aurre egin" dietela.

Ertzaintza bertaratu denean, errepidean olioa zegoela ohartu dira, eta hori "arazo gehigarria zen zirkulazioaren egoerarentzat". Hori dela eta, Ertzaintzak suhiltzaileei eman diete abisua errepidea lehortzeko materialarekin garbi zezaten.

09:50erako, suhiltzaileek errepidea garbitua zuten eta zirkulazioa bere onera itzuli da pixkanaka.