Baliteke Irungo jazoeraren egilea zauritutako gaztea bera izatea

Ertzaintzak igande honetan baieztatu duenez, ikerketari esker lortutako "frogei erreparatuta, hipotesi nagusia da" astearte honetan Irunen koma egoeran eta eskuak lotuta aurkitutako gaztea bera "jazoeraren egilea" izatea.

Hala mintzatu da ere Segurtasun Sailak; horren arabera, litekeena da gazteak berak egindako ekintza izatea. Dena dela, ikerketak zabalik jarraitzen du.

GI-636 errepidearen Irungo saihesbidearen alboan dagoen ezponda batean, larri zaurituta, eskuak lotuta eta ahoa estalita, eta koma egoeran aurkitu zuten 24 urteko gaztea joan den asteartean, 10:30ak aldera.

Suhiltzaile talde batek biktima erreskatatu behar izan zuen, sasi eta zuhaixka artean baitzegoen. Donostiako Ospitalera eraman zuten, eta orduan Segurtasun Sailak ez zuen biktimaren inguruko daturik zabaldu.