Abisu horia barnealdean elurragatik, ostiral eta larunbaterako

Euskadiko barnealdean elurra egiteko aukera dela eta, Segurtasun Sailak abisu horia deituko du ostiral gauetik larunbat goizera arte, abenduaren 8tik hilaren 9ra arte, alegia.

Ostiralean, abisu horia gaueko bederatzietan sartuko da indarrean elurraren arriskuagatik; izan ere, une horretan, iragarpenaren arabera, elur-kota 800-1.000 metrora jaitsiko da. Prezipitazioak txikiak izango dira, eta, batez ere, isurialde atlantikoan botako du.

Larunbatean, eta aldaketarik ez badago, abisua goizeko bederatzietan geratuko da bertan behera; egun horretan, elur-kota 800-900 metroan geratuko da goizaldean, baina 1.000 metrora igoko da eguerdirako. Egunaren azken orduetarako 1.400-1.500 metrora igotzea aurreikusi dute.

Larunbaterako, eguraldi-iragarpenaren arabera, zaparrada txikiak edo ertainak izango ditugu, isurialde atlantikoan batik bat.

Igandean, gainera, abisu horia aktibatuko du Segurtasun Sailak haizeagatik haizeguneetan, eguerditik gauerdira bitartean. Hego-mendebaldeko haize-boladek 100 km/h-ko abiadura gaindituko dute haizeguneetan, bereziki mendebaldean.