Gizartea -
Gertaera
Hainbat etxebizitza hustu dituzte Bilboko Ledesma kalean, sute baten ondorioz
Inor ez da zauritu bart piztutako sutean. Antza denez, etxebizitza batean piztu da sua, koltxoi batek su hartu ostean. Kea kanporatu ostean amaitu zituzten lanak suhiltzaileek.
Agentziak | Erredakzioa
Bilboko Ledesma kaleko 14. zenbakiko hainbat etxebizitza jendez hustu behar izan dituzte bart arratsaldean, sute baten ondorioz. Antza denez, etxebizitza batean piztu da sua, koltxoi batek su hartu ostean. Dena dela, inor ez da zauritu, Eusko Jaurlaritzako Segurtasun Sailak jakitera eman duenez.
20:20ak aldera, larrialdi zerbitzuak hainbat dei jaso zituen Bilboko Ledesma kaleko etxebizitza batean piztutako sutearen berri emanez. Lekura hurbildu ziren suhiltzaileek, inguruko etxebizitzak jendez hustu zituzten, kalte pertsonalak saihesteko asmoz.
Sutea txikia izan zenez, kea kanporatu ostean amaitu zituzten lanak suhiltzaileek. Gauzak horrela, 22:30ak aldera kaltetutako bizilagun guztiak haien etxeetara bueltatzeko aukera izan zuten.