Elurra berriro: abisu horia ezarri dute ostegunerako, ostiralerako eta larunbaterako

Amaitu da "eguraldi ona". Astea egonkor hasi badugu ere, ostegunetik aurrera petraltzen hasiko da giroa, eta euria, hotza eta elur-kotaren jaitsiera izango dira protagonista fronte hotz baten ondorioz. Euskalmetek egindako iragarpenaren arabera, Larrialdiei Aurre Egiteko eta Meteorologiako Zuzendaritzak lau abisu hori ezarri ditu, egun bakoitzerako bi: elurragatik, bata, eta itsasaldeko arriskuagatik, bestea.

Ostegunean, euritara joko du, eta sarri eta ugari egingo du, gainera. Haizea mendebal/ipar-mendebaldetik finkatuko da, eta hoztu egingo du. Hala, elur-maila arratsalde-gau partean 700-800 metrora jaits daiteke. Halaber, gauean ekaitzak jo eta txingorra egin lezake, eta baliteke elur-maila are gehiago jaistea ekaitz-eremuetan. Horrela, 18:00etan hasi eta gauerdira arte, abisu horia egongo da indarrean.

Itsasoan ez da giro izango, eta olatuen altuera adierazgarria 3,5-4 metrokoa izango da. Lehen bi milietarako, nabigaziorako abisua ezarri du Jaurlaritzak, 06:00etan hasita. Ostiralean, egun osoan izango da indarrean abisu horia.

Ostiralean ere, giro makurra izango da. Tenperatura maximoak 9-10 ºC inguruan ibiliko dira gehienez, eta zaparradak botako ditu egun osoan, sarriago isurialde atlantikoan. Horrekin batera, baliteke trumoi-ekaitzak izatea eta txingorra ere egitea. Elur-maila 600-700 metrora egongo da goizaldean, eta 700-800 metrora geratuko da gainerako orduetan. Halere, ekialdeko zenbait tokitan eta ekaitz eremuetan, beherago egon liteke elur-maila. Abisu horia egun osoan egongo da indarrean. Ipar-mendebaldeko haizea ibiliko da, bereziki zakar kostaldean eta Ebro ibarrean.

Larunbatean ere, abisu horia izango da elurragatik barnealdean 00etatik 09etara. Elur-kota 800 eta 900 metro inguruan egongo da egunaren lehen partean; arratsaldean, 1.200 eta 1.400 metro artera igoko da. Prezipitazio txikia egingo du, probabilitate handiagoarekin isurialde atlantikoan eta mendebaldean; arratsalde-gauean, atertzeko joera izango du. Lodiera hauek aurreikusi dituzte: 2-10 cm 1.000 metrora, 0 cm 600 metrora eta 0 cm 200 metrora.