Urbancasako iruzurreko inputatuak dirua itzultzeko asmoa zuela esan du

Maria Victoria Ferrer eta Angel Maria Crespo Urbancasako higiezinen enpresako bi arduradunen aurkako epaiketa hasiko da gaur, astelehenean, Donostian. Eraikitzeko asmorik ez zuten etxebizitzak eta eurenak ez ziren lursailak saldu omen zizkieten 44 pertsonari, eta ustez 1,17 milioi euro inguru maula egin zieten.

Angel Crespo Urbancasako iruzurreko inputatuetariko batek bere emaztea errugabea dela esan du, eta dirua itzultzeko asmoa zuela gaineratu du.

Fiskaltzaren idazkiaren arabera, "legez kontra irabazia ateratzeko asmoa besterik ez zuen" bikoteak; izan ere, ez zituzten sekula lursailak erosi, "ez zuten baimenik", eta kontratua deuseztatuz gero, "ez zuten dirua itzultzeko asmorik".

Zenbait kaltetuk emandako dirua bueltatzea eskatu zietenean, Urbancasako arduradunek ez zuten egin eta eraiki ez zituzten beste etxe batzuk erosteko diru gehiago ematea proposatu zieten.

Gipuzkoako Fiskaltzak bi auzipetuetako bakoitzarentzat zazpi urte eta bederatzi hilabeteko espetxe-zigorra, euren gaitasungabetzea eta 5.400 euroko isuna eskatzen du, etengabe iruzur egiteagatik.

Guztira, iruzurrezko 27 eragiketa leporatzen diete, hain zuzen, Urnietan (Gipuzkoan) eta Nafarroako Ablitas, Murchante, Lesaka, Valtierra, Lekunberri, Deikaztelu eta Tulebras herrietan eraikitzeko asmorik ez zuten etxeak saltzea.

Epaiketaren zain, hiru urte eman dituzte kartzelan bi auzipetuek. Iruzurra aireratu zenean, ihes egin eta leku ezezagunen batean zeuden, baina, 2007ko urriaren 23an, alkoholemia-kontrol baten atxiki zituzten Tarragonan.

Kaltetu eta lekuko asko deklaratzera deitu dituztenez, epaiketa ia bi aste iraungo duela espero da.