Gizartea -
Segurtasuna
Bizkaibusen gaueko zerbitzuan tarteko geltokiak izateko aukera aztertzen ari dira
Bestalde, argiztatuta egongo diren markesina gardenak jartzen hasi dira, baita autobusetan segurtasun-kamerak instalatzen ere.
EUSKADI IRRATIA
Bizkaibusen gaueko zerbitzuan tarteko geltokiak izateko aukera aztertzen ari da Bizkaiko Foru Aldundia, herritar guztien baina bereziki emakumeen segurtasuna hobetzeko asmoz.
Aldundiak oraintsu egindako txosten baten arabera, Bilboko metropolian bizi diren emakumeen % 42k inoiz ibilbidea aldatu dute segurtasun arrazoiak tarteko, batez ere gauez etxera itzultzeko bidean.
Horregatik besteak beste eta denen segurtasuna bermatzeko helburuz, Bizkaibusen tarteko geltokiak jartzea aztertzen ari da Aldundia.
Vicente Reyes Garraio diputatuak Euskadi Irratian esan duenez, "ondo aztertu beharreko kontua da, Bizkaibusek kilometro askoko ibilbidea baitu". Hori bai, Aldundia neurri hori ezartzearen aldekoa dela erantsi du.
Nolanahi ere, segurtasuna hobetzeko lanetan ari dira jada: Bizkaibusen markesina berriak erabat gardenak izango dira eta argiztapen propioa izango dute.
Bestalde, Bizkaibuseko autobusen erdiak dute barruan segurtasun-kamera bat jarrita.
