Etxebizitza baten jabea lotu dute lapurretan egiteko, Donostian

Ertzaintzak gizonezko bat atxilotu du eta beste biren bila ari da Amarako etxebizitza batean lapurretan harrapatu ostean. Radio Euskadik ikerketako iturriak aipatuta jakinarazi duenez, lapurrek etxebizitzaren jabea lotu zuten eta ahoa estali zioten balkoitik alde egin aurretik.

Dirudienez, biktimak ireki zien atea bizilagun bat zela pentsatuta.

Baina bizilagun batek abisua eman zion Ertzaintzari, lapurrak emakumea lotzen ari zirenean oihuak entzun zituelako. Aipatu iturrien arabera, agenteak biktimaren etxebizitzara iritsi zirenean, lapurrak barruan zeuden. Behatxulotik poliziak ikusi zituztenean, lapurrek alde egin zuten. Balkoitik atera ziren, Felipe IV.a kaleko seigarren solairutik.

Horietako batek, aurrekari penal ugari dituen gizonezko batek, ezin izan zuen ihes egin eta atxilotuta eraman zuten. Beste biek ihes egin zuten eta haiek bilatzeko lanean ari da Ertzaintza.

Bitxiak eta balio handiko beste objektu batzuk eraman zituzten.