Gizartea
Babestutako espeziea
20 marrazo konfiskatu dituzte Ondarroan, arrantza ontzi batean
Agentziak | Erredakzioa
'Lamna nasus' espeziea babestuta dago eta ezin da harrapatu, Atlantikoko Atuna Babesteko Nazioarteko Batzordearen gomendioen arabera.
Arrantza Ikuskaritzako funtzionarioek Lamna nasus espezieko hogei marrazo konfiskatu dituzte Ondarroan porturatutako arrantza-ontzi batean.
Ikuskaritzako zerbitzuak jakinarazi duenez, atzo (asteartea) goizeko lehen orduan "tamaina handiko aleak" konfiskatu zituzten; guztira, 1.660 kilo.
Espezie hori babestuta dago eta ezin da harrapatu, Atlantikoko Atuna Babesteko Nazioarteko batzordearen gomendioen arabera.
Hori dela eta, Bizkaiko Elikagaien Bankuari emango dizkiete ale horiek, irabazi-asmorik gabeko elkarteko erabiltzaileen artean banatzeko.
