Udan protestekin jarraitu edo ez aztertuko dute pentsionistek

Astelehen honetan ere mobilizazioak izan dira Euskal Herriko hiri eta herrietan 1.080 euroko gutxieneko pentsio duinak aldarrikatzeko.

Beste behin, Bilbokoa izan da bilkura jendetsuena. 2.000 jubilatu eta pentsiodun baino gehiagok hartu dute parte udaletxea eta Arriaga plaza lotu dituen manifestazioan.

Datorren astelehenerako beste mobilizazio bat deitu dute eta uztailaren 4an Euskal Herriko pentsionistek bilera bat egingo dute, udan protestei eustea edo ez aztertu eta erabakitzeko.

Euskal Herrian egiten ari diren borroka eskertuz, Bilboko manifestazioan Sevillako eta Madrileko jubilatuak eta pentsiodunak izan dira gaur.

Gasteizen eta Donostian ere egin dituzte protestak eta ehunka lagun bildu dira.