Abisu horia ezarri dute gaur arratsalderako, euriagatik

Euri asko espero da datozen orduotarako EAEko hainbat lekutan, eta, hori dela eta, abisu horia ezarri du Eusko JaurlarItzako Segurtasun sailak; aurreikuspenen arabera, hainbat lekutan ordubetean metro karratuko 15 litro bota ditzake.

15:00etatik 00:00etara egongo da ezarrita abisua Araban, Bizkaian eta Gipuzkoan.

Euskalmeten arabera, giro aldakorra eta ezegonkorra izango dugu datozen orduotan, uda sasoiko tenperaturarekin. Egunaren hasieran, zerua tarteka hodeitsu egongo da eta han-hemenka zaparrada txiki batzuk botako ditu. Goizak aurrera egin ahala, atertu eta garbitzera egingo du. Arratsaldeak aurrera egin ahala, ordea, bero-hodeiak garatuko dira eta zaparrada trumoitsuak bota ditzake, batez ere barnealdean.

Bihar, igandea,  giro eguzkitsua espero da. Tarte hodeitsu batzuk ere izango dira, baina oro har eguzkia gailenduko da. Arratsaldean, ezegonkortasuna handitu egingo da, bero-hodeiak garatuko dira, eta berriro ere zaparrada trumoitsuak bota ditzake.