Nafarroa abisu horian, 35 ºC-tik gorako tenperaturak aurreikusten baitira

Espainiako Meteorologia Agentziak abisu horia ezarri du Nafarroan ostegunerako eta ostiralerako, bero handia espero baita.

Abisua Erkidegoaren erdialdean eta Erriberan egongo da indarrean gaur, eta Erriberan bakarrik ostiralean. 35 ºC baino gehiago espero dira.

Iragarpenen arabera, tenperatura minimoak 17 gradu ingurukoak eta maximoak 34 gradukoak izango dira Iruñean; Tuteran, 22-37 ºC bitartekoak, eta Lizarran, 19-34 ºC bitartekoak. Erronkarin, berriz, hotzenak 16 gradukoak izango dira, eta beroenak, 34 ºC-koak.

Nafarroa iparraldean euria egin dezake. Erdialdean eta hegoaldean, berriz, iluntzerako bero-hodeiak garatuko dira, baina ateri eutsiko dio. Erriberan haize zakarra espero da arratsaldetik aurrera.