Euskal atun-ontzi batek piraten erasoa ekidin du Indiako Ozeanoan

''Albatun II'' euskal atun-ontziak piraten eraso bat saihestu du gaur goizean Somaliako uretan, Indiako Ozeanoan, Efe albiste-agentziak Bermeoko Albacora enpresa armadorearen iturriak aipatuta zabaldu duenez. Eraso saiakera 09:00ak inguruan gertatu da. Piratak atun-ontzia harrapatzen ahalegindu dira, baina azken hori egoeraz jabetu da eta ihesari eman dio. Abiada bizian egin dute ihes eta piratek amore eman dute. Atun-ontziak segurtasun pribatua darama, baina ez da beharrezkoa izan tiroka hastea. Piratak gutxienez bost ziren eta armatuta zihoazen.