Frantziako Konstituzionalak homosexualen ezkontzen debekua babestu du

Frantziako Konstituzio Kontseiluak homosexualen ezkontzen debekua babestu du, Kode Zibilean agertzen dena Konstituzioarekin bat datorrelakoan.

Auzitegiaren arabera, legeak ez du diskriminatzen, bikote batek ezkondu ahal izateko batek gizona eta besteak emakumea izan behar duela ezartzen du.

Kontseiluak zehaztu du Parlamentua izan behar dela araua aldatu behar duena homosexualen ezkontzak legeztatu nahi baditu.

Konstituzionalak uste du egungo legeak ez diela homosexualei familia normala bat izateko aukera ukatzen, izatezko bikote egin daitezkeelako. Hala ere, "eskubide horrek ez du sexu berekoen ezkontza ahalbidetzen", Konstituzionalaren arabera.

Gainera, auzitegiak uste du Kode Zibilaren arauak ez duela berdintasun printzipioa hausten ezkontza bat egiteko bikotekideetako bat gizona eta bestea emakumea izan behar direla ezartzen duelako, legegileak homosexualen eta heterosexualen arteko ezkontzak baimentzeko aukera baitu.

Hori horrela, Kontseiluak duela pare bat hilabete homosexualek adopzioak egiteko duten aukeraren inguruan hartu zuen erabakiaren antzerakoa hartu du. Orduan egin zuen legez, ez ditu legearen aldaketak baldintzatu nahi izan, hori Parlamentuko kideen esku utzi du.

Homosexualak, atsekabetuta

Homosexualen elkarteak atsekabetuta agertu dira Konstituzionalaren erabakiarekin, auzitegiaren "ausardia falta" salatu dute.

Emmanuel Ludot abokatuarentzat (auzia Konstituzionalera eraman zuen bikote lesbianen ordezkaria da) ebazpena "politikoa" izan da.

Ludotek, orain, beste galdera bat egingo dio Konstituzionalari: ea homosexualen ezkontzak legezkoak diren herrialdeetan herritar frantziarrak ezkontzen badira Hexagonoan balioa izango ote duten.