Auto bat harrapatuta geratu da Iruñeko aparkaleku bateko eskaileretan

Larunbat iluntzean, 21:45ean, 56 urteko gidari bat Iruñeko aparkaleku bateko eskaileretan bere autoarekin harrapatuta geratu zen. Bakearen plaza igarota, Armada etorbideko espaloira igo zen autoarekin, Baluarte ondoan, eta bertan dagoen aparkalekuko eskaileretan harrapatuta geratu zen, azkenik. Ondoren, positibo eman zuen alkohol-proban. Ezbeharra gertatu zenean, ez zegoen oinezkorik parkingaren sarreran.

Asteburuan zehar, 18 ezbehar jazo dira Iruñean, eta bi lagun zauritu dira.

Batetik, auto batek zazpi urteko haur bat harrapatu zuen zebrabide batean. Hankan kolpea eman zion, eta ospitalera eraman behar izan zuten, baina ez zeukan zauri larririk, Bide Segurtasuneko iturriek jakitera eman dutenez.

Bestetik, urriaren 21ean, 01:00ean, 58 urteko txirrindulari batek 41 urteko emakume bat harrapatu zuen San Lorentzo kalean. Alkohol-proban positibo eman zuen azken horrek ere.

Bukatzeko, asteburuan, Udaltzaingoak 11 gidari zigortu ditu baimendutako alkohol-tasa gainditzeagatik. Gainera, beste sei gidariren aurkako eginbide judizialak abiatu dituzte, edanda gidatzeagatik.