Karabina batekin oinezkoei tiro egiteagatik Tolosan atxilotu dute

36 urteko gizonezkoa atxilotu du larunbatean Ertzaintzak, Tolosan (Gipuzkoa), aire konprimituzko karabina batekin oinezkoei tiro egiteagatik, Herrizaingo Sailak jakitera eman duenez.

Joan den urtarrilaren 31ean Tolosako kaleetatik oinez zihoan emakumezko batek balatxo baten talka jaso zuen aurpegian. Gainera, taberna batetik atera berri zen emakumezko batek beste lau balatxoaren talkak jaso zituen hanka batean eta bizkarrean. Bi hauen salaketen ostean, zainketa lanak egin zituen Ertzaintzak. Azkenean, Tolosako auzokidea atxilotu zuten.

Atxilotuaren etxea miatu zuten agenteek eta bertan ustez erabilitako arma eta balatxo-kutxa aurkitu zituzten. Beharrezko izapideak burutu bezain laster jarriko dute epailearen esku; atxilotuak polizia aurrekariak ditu.