Etxeetan lapurtzen duen talde bateko ustezko bi kide atxilotu dituzte Leioan

Ertzaintzak, Leioako Udaltzaingoarekin batera, 20 eta 37 urteko bi gizon atxilotu ditu, etxeetan lapurtzen duen talde bateko kide izatea egotzita.

Segurtasun Sailak jakitera eman duenez, ostiralean egin zituzten atxiloketak; Bilbo, Getxo eta Leioako hiru etxebizitzatan lapurtzea egotzi diete atxilotutako bi gizonei.

Ertzaintzaren ustez, delitugintza modu honetan espezializatuta dagoen talde baten partaide izan litezke, eta Bizkaian izandako hainbat lapurretekin izan dezaketen inplikazioa aztertzen ari da.

Ostiralean, Leioako Udaltzaingoak pertsona baten deia jaso zuen; horren bidez, bi gizon haren etxeko atea manipulatzen ari zirela jakinarazi zion. Etxea Bizkaiko herri berean zegoen.

Bertaratu ziren agenteek bi gizon atzeman zituzten bidean; bat nortasun-agiririk gabe zihoan. Halaber, etxeetan lapurtzeko hainbat objektu zeramatzaten, besteak beste, orotariko giltzak eta gakorde bat. Ondorioz, atxilotu egin zituzten.

Behin Ertzaintzaren polizia-etxean zeudela, agenteek ustezko lapurrak identifikatu zituzten, eta biek aurrekariak zituztela ikusi zuten, Bizkaiko hainbat etxetan egindako lapurretengatik.

Atxilotutako baten autoa erregistratzean, lapurretak egiteko erabilitako tresna asko aurkitu zituen Ertzaintzak, tartean aizto handi bat.

Azaroaren 3an Bilboko etxe batean lapurtutako maleta bat ere aurkitu zuten, baita 20.000 peso kolonbiar ere.

Ertzaintzak ikerketarekin jarraitzen du, Bizkaiko etxebizitzatan egindako lapurretekin duten ustezko inplikazioa zehazteko, jarduteko modu bera erabili den lekuei dagokienez. Beharrezko eginbideak burutu ostean, atxilotutako pertsonak epailearen esku utzi zituzten, eta aske geratu ziren.