Karbono monoxidoa arnastuta Iruñean intoxikatu zen hirugarren adinekoa hil egin da

Joan den astean karbono monoxidoa arnastuta Iruñean intoxikatu zen 88 urteko gizona bart hil da, hainbat egun larri eman ostean. Ezbeharrean, beste bi emakume hil ziren: 86 urteko bat eta 91 urteko beste bat.

Foruzaingoak Efe albiste agentziari jakinarazi dionez, intoxikazioa San Agustin kaleko 38. zenbakiko bigarren solairuko etxebizitza batean gertatu zen; emakumeetako baten semea etxebizitzara joan zen, amak telefonoa ez ziola hartzen ikusita, eta barrura sartu zenean, hiru adinekoak lurrean etzanda ikusi zituen; horietako bat hilda zegoen.

Foruzaingoak ezbeharraren nondik norakoak argitzeko abiatutako lehen ikerketen arabera, gas naturaleko galdara baten konbustio txarrak eragin zuen intoxikazioa.