Mozkortuta eta autoan argirik gabe zihoan gidari bat ihes egiten saiatu da Gasteizen

Autoan argirik gabe eta modu arraroan gidatzen zihoan 30 urteko gizonezko bat gelditu zuen atzo gauean Gasteizko Udaltzaingoak. Alkoholemia froga egin zioten, orduan, eta onartutako muga hirukoiztu zuen.

Esan bezala, 22:00ak aldera, Arriagako atea kalean gertatu zen ezbeharra. Han, gidariari gelditzeko agindua eman zioten udaltzainek, autoko argiak itzalita zituelako eta maniobrak modu arraroan egiten zituelako, Gasteizko Udaltzaingoak gaur jakinarazi duenez.

Gelditu zutenean, baina, gidariak ez zien jaramonik egin. Ibilgailua azeleratu eta handik alde egiten saiatu zen. Alabaina, geroago, Taldearen kalean harrapatu zuten.

Une hartan, alkohola edan izanaren zantzuak zituen. Horregatik, alkoholemia froga egin zioten, eta 0,81 miligramoko alkohol tasa eman zuen, baimendutakoaren hirukoitza.

Dena dela, nahiz eta derrigorrezkoa izan, bigarren froga egitera ukatu zen. Hori dela eta, ikerketa abiatu du Udaltzaingoak, eta mozkortuta gidatzea, alkohol froga egiteari ezetz esatea eta ihes egitea egotzi diote gidariari.