Lehendakaria: 'Euskadi erakargarriago egin behar dugu guztien artean'

Euskadiko promozio turistikoan gizartearen konpromisoa eskatu du Patxi Lopez lehendakariak, "Euskadi norako turistiko gaztea delako, baina hazkunde prozesu argi batean".

''Sekula baino gehiago behar zaitugu'' lelopean mila bat lagun bildu dira euskal turismoaren enbaxadoreei egindako omenaldian, Bilboko Guggenheim Museoan. 2010 Euskadiko turismoaren historiako ekitaldirik arrakastatsuena izan da eta horretarako lan egin duten lagunei eskerrak eman dizkiete gaur.

"Herritar guztiak turismoaren promozioan inplikatu" behar dituztela adierazi du lehendakariak, "herrialde irekiago eta abegitsuago bat egiteko". "Gizarte osoa turismoaren promozioan inplikatu behar dugu", Lopezen ahotan. "Guztien artean, egunero, Euskadi abegitsuago eta erakargarriago bat egin behar dugu", erantsi du.

Ildo horretan, EAEko turismoaren garrantziaren berri emateko kanpaina baten aurreko jaialdia izan da; 2010eko datu bikainen ostean, hazkunde bide horretan jarraitu behar dela esan dute. EAEko turismo sektoreak 19 hilabeteko hazkunde jarraia izan du, eta iaz, marka guztiak apurtu ziren, eta inoiz baino bidaiari gehien izan ziren EAEn.

Gonbidatuak

Milaka gonbidatu izan dira, besteak beste, erakundeetako eta enpresetako, kirola eta kultura arloko ordezkariak izan dira. Era berean, ''enbaxadore'' ezagun asko izan dira bertan. Halaber, Eusko Jaurlaritzako kontseilari gehienak izan dira, Espainiako Gobernuko ordezkaria EAEn, hamabina alkate eta Euskadiko kirol taldeetako ordezkari batzuk.

Turismo eta upeltegi sektoreetako, Euskadiko zenbait kontsul, hainbat sukaldari, La Oreja de Van Gogh musika taldekoak, Inma Shara orkestra zuzendaria, Modesto Lomba diseinatzailea, Miguel De la Quadra-Salcedo izan dira Guggenheim Museoan. Hedabideetako ordezkariak, eta Miguel Lazpiur Confebaskeko presidentea izan dira.