Gidari bat larri zauritu da Iruñean, zuhaitz baten aurka talka eginda

52 urteko gidari bat larri zauritu da bart Iruñean, horrek zeraman ibilgailuak zuhaitz baten aurka talka eginda, Udaltzaingoak jakinarazi duenez. Unibertsitateko kalean gertatu da ezbeharra.

Gainera, lan istripu bat gertatu da asteburuan Irurita apezpikuaren plazan. 59 urteko gizon bat altueratik erori da, eta Nafarroako Ospitale Gunera eraman dute.

Bide Segurtasunaz arduratzen diren agenteek hamaika trafiko istriputan esku hartu behar izan dute. Kasurik gehienetan, baina, kalte materialak soilik egon dira.

Bestalde, Udaltzaingoak 313 alkohol eta droga proba egin ditu asteburuan. Bi gidariren kontrako auzibide penala ireki dute, baimendutako alkohol tasa gainditzeagatik. Halaber, zazpi gidari salatu dituzte baimendutako alkohol tasa gainditzeagatik eta beste bi, ostera, drogaren eraginpean gidatzeagatik.