Euskal ekoizleek labeldun 860.000 litro sagardo merkaturatuko dituzte

Hogei ekoizle inguruk labeldun lehenengo 860.000 litro sagardo merkaturatuko dituzte hilabete honen amaieran, tokiko milioi bat sagar erabilita. Momentuz, 20 ustiategik hartuko dute parte: 14, Gipuzkoan eta sei, Bizkaian. Hala ere, proiektuan parte hartzeko beste zazpik izena eman dute.

Prozesu osoan zehar produktua kontrolpean dagoela babesten du Eusko Label izendurak: sagarrondoan dagoenetik, sagardoa garraiatzean eta ekoiztean, ontziratze eta etiketatu arte. Gainera, Kalitatea Fundazioak prozedura guztia jarraitu egiten du. Erakunde honek produktuaren 15 parametro inguru aztergai ditu, laborategi eta unibertsitate desberdinetan. Gainera, Kalifikazio Batzorde batek produktua dastatu eta ikuste eta usaimen-ezaugarriak ikuskatzen ditu.

Usurbilgo (Gipuzkoa) sagardotegi batean izan da aurkezpen-ekitaldia eta bertan izan da Pilar Unzalu Ingurumen, Lurralde Plangintza, Nekazaritza eta Arrantza sailburua. Unzaluk sagardoaren ekoizleak zoriondu ditu, egindako "esfortzuagatik eta adoreagatik". Gainera, labeldun produktuak kalitate handikoak direla gogoratu du sailburuak. Unzaluren hitzetan, "horrek gure lehiakideengadik bereiziko gaitu".