Sikarioak eskaintzen zituen webgune baten kontrako operazioa egin dute

Guardia Zibilak 14 lagun atxilotu eta bi gehiago auzipetu ditu Interneteko foro batean diruaren truke mehatxu eta hiketa zerbitzuak eskaintzea leporatuta, hau da, "sikarioak" eskaintzea egotzita.

Erabiltzen zuten Interneteko atariak Mexikoko domeinua zuen eta "asesinos a sueldo" zuen izena. Iruñeko herritar batek salatu zuen 2009ko udan eta hor hasi zen Poliziaren ikerketa.

"Boel" operazioa Alacanten, Almerian, Bartzelonan, Castellon, Madrilen, Malagan, Murtzian, Ourensen, Tarragonan, Valentzian, Bizkaian eta Nafarroan egin dute, eta jipoiez eta mehatxuez gain, hilketak ere agintzen zituztela jakin dute.

Foroan agertzen ziren komentario batzuetan biktima posibleen datuak ematen zituzten: bizilekua, garaiera, sexua, adina eta zerbitzua egiteko prezioa (4.000 eta 10.000 euro artean), besteak beste.

Atxilotuen artean Malagako emakume bat dago. Emakume hori lau sikariorekin jarri zen harremanetan Internetez, senarra hil zezaten.

Foroa itxi egin zuten eta erabiltzaileak askotarikoak ziren: benetan erabili nahi zutenak, sikarioa kontratatu nahi zutenak, sikario gisa lan egin nahi zutenak, iruzurra egin nahi zutenak eta jolas moduan hartzen zutenak.