Espetxean sartu dute Barakaldoko erasoarekin lotuta atxilotutako gizona

Barakaldon larunbatean gizon bati zauri larriak eragitea leporatuta, 27 urteko gizon bat atxilotu zuen atzo Ertzaintzak, eta epaileak gaur espetxera bidali du, Segurtasun Sailak jakitera eman duenez.

Erasoa 06:30 inguruan izan zen, Barakaldoko Zaballa kaleko diskoteka baten parean. Larri zaurituta eta konorterik gabe utzi zuen erasotzaileak 35 urteko gizonezkoa. Gurutzetako Ospitalera eraman zuten, eta Zaintza Berezien Unitatean dago ingresatuta.

Agenteak bertaratu zirenerako, erasotzaileak ihes egitea lortu zuen, baina ordu gutxira identifikatu eta atxilotu zuten. Atzo arratsaldean hartu zuten preso, lesio delitua egotzita.

Gaur goizean epailearen aurrean deklaratu ondoren, espetxeratu egin dute.