4.000 ibilgailuk erabili dute A-8ko bide itzulgarria Ostegun Santuan

Ia 4.000 ibilgailuk A-8 autopistako bide itzulgarri berezia erabili zuten Ostegun Santuan, Eusko Jaurlaritzak jakinarazi duenez.

Amparo López Trafikoko zuzendariak positibotzat jo du gidariek A-8an, Kantabriara bidean, jarritako bide itzulgarria erabili izana bereziki, Ostegun Santu goizean, orduan bildu baitzen kostako udalerrietara bidean zihoazen ibilgailuek eragindako trafiko-fluxu handiena.

A-8an, Ugaldebieta eta Liendo artean, jarritako bide itzulgarriari esker, Ostegun Santuan ez ziren sortu oporretako irteera faseetan errepide horretan sortzen diren auto-ilarak.

Trafiko gehiengo orduetan ibilgailuen kopurua % 21,8 hazi zen 2010eko datuekin alderatuta. Aurten arazo nabarmenak trafiko motelak eragin ditu, bi kilometrotan zehar geldialdiak egiten zituzten ibilgailuek. Ez ziren beraz, ohi bezalako auto-pilaketak egon; iaz 17 kilometroko luzera hartu zuten.

“Gidarien jokabidea oso ona izan da eta horri esker, beste urteetan ordu tarte hauetan izan diren ilarak ekidin dira. Errailak bere eginkizuna bete du eta, ia egun osoan zehar, trafikoan geldialdirik ez egotea ahalbidetu du, handik igarotako ibilgailu kopurua igo bada ere”, azaldu du Trafikoko zuzendariak.

Apirilaren 21eko goizean 3.983 ibilgailuk erabili zuten Eusko Jaurlaritzako Trafiko Zuzendaritzak jarritako bide itzulgarria. Hau da, erraila irekita egon zen lau orduetan Kantabriako noranzkoan joan ziren ibilgailuen (guztira 16.429) % 24ak erabili zuen.

2010eko datuekin alderatuz, aurtengo Ostegun Santuan, aipatutako orduotan, % 21,8 igo da A-8tik pasa den ibilgailu kopurua. Herrizaingo Saileko Trafiko Zuzendaritzako arduradunak pozik agertu dira bide itzulgarriarekin lortutako emaitzak ikusita. Apirilaren 8an 1.248 ibilgailuk erabili zuten, apirilaren 15ean 596k, apirilaren 20an 2.977k eta apirilaren 21ean 3.983k.

Ekainean jarriko dute berriz martxan bide itzulagarria, Kantabriako kostako herrietara bidean doan trafikoa nabarmen hazten den asteburuetan hain zuzen. Horrez gain, Metropoliko Hegoaldeko saihesbidea martxan jartzen denean, beste bide itzulgarri bat abiatzeko asmoa dute erkidego horretatik Bizkaiako noranzkoan.