Gizartea -
Iruña
Emakume bat hil da Iruñeko etxe bateko balkoitik erorita eta semea atxilotu dute
Emakumea laugarren solairutik behera erorita zendu da. Semea Udaltzaingoaren polizia-etxean dago atxilotuta.
AGENTZIAK | ERREDAKZIOA
Emakume bat hil da ostiral honetan Iruñean etxebizitza bateko laugarren solairutik behera erorita, eta haren semea atxilotu dute gertakariarekin zerikusia izan dezakeelakoan, EFE agentziak jakinarazi duenez.
Gertakaria Iturrama auzoko Fuente del Hierro kalean dagoen 25 zenbakidun eraikinean jazo da, 16:45 inguruan. Espainiako Polizia eta Iruñeko Udaltzaingoa arduratu dira ikerketaz.
Espainiako Gobernuak azaldu duenez, ezbeharraren tokira medikuak eta anbulantzia bat bertaratu dira, baina ezin izan dute ezer egin emakumearen bizitza salbatzeko, erori eta berehala hil baita.
Atxilotutako gizonezkoa Udaltzaingoaren polizia-etxera eraman dute. Iruñeko bigarren instrukzio epaitegiko epaileak ikertuko du gertakaria.