Bikotekide ohia lehen pisuko balkoitik botatzeagatik atxilotu dute

Murtzian 34 urteko gizonezkoa atxilotu dute bikotekide ohia lehen pisuko balkoitik botatzeagatik. Lekukoen arabera, emakumezkoak barandari eustea lortu zuen baina azkenean kalera erori zen erasotzaileak emandako kolpeen ondorioz.

Udaltzaingoko bozeramaile batek Efe albiste agentziari esandakoaren arabera, gertaera astezkeneko 15:10ean izan zen, Santiago y Zaraiche Murtziako auzoko etxebizitza batean. Biktimak eta ustezko erasotzaileak eztabaida gogorra izan zuten eta atxilotuak, Dominikar Errepublikan jaiotako holdandarrak, marokoar jatorriko emakumezkoa balkoitik behera bota zuen, 35 urteko biktimaren ahizpa aurrean zela.

Emakumea ahoz gora erori zen eta burutik odola zerion. 061eko osasun arduradunek artatu eta Murtziako Morales Meseguer Ospitalera eraman zuten buruan traumatismoa zuela. Bere osasun egoerak onera egin du azken orduetan, ospitaleko medikuek zabaldutako lehen informazioen arabera.

Udaltzaingoak ustezko erasotzailea etxebizitzan bertan atxilotu zuen. Biktimaren eta lekukoen arabera, atxilotuak besoetan kolpeak eman zizkion emakumeari barandari eustea lortu eta laguntza eske ari zenean.