Gizartea -
Eguraldiaren iragarpena
Giro nahasia eta ezegonkorra izango da gaur nagusi
Goizean eguraldi lasaia eta eguzkitsua izango den arren, arratsaldean zaparrada trumoitsuak bota ditzake edonon. Bihar eguraldi nahasiagoa eta ezegonkorragoa izango dugu.
Erredakzioa
Giro nahasia eta ezegonkorra izango dugu gaur. Egunaren bigarren partean zaparrada trumoitsuak nonahi botako ditu, Euskalmet, euskal meteorologia agentziak azaldu duenez. Goizean, aldiz, eguraldi lasaia eta eguzkiaz goza ahal izango dugu. Tenperaturak ez du aldaketa handirik nozituko eta beroenak 22-24 º ingurukoak izango dira. Haizea suabe ibiliko da, noraezean hasieran, baina arratsaldean iparraldetik finkatuko da.
Astea hasi eta ezegonkortasuna areagotu egingo da. Astelehenean, beraz, egunak aurrera egin ahala zaparradak ugaritu eta trumoiak jotzeko arriskua handitu egingo da; arratsaldean gogotik bota dezake, bereziki Nafarroan. Euri-zaparradak lurralde osora iritsiko diren arren, irregularki banatuko dira eta sarriagoak izango dira egunaren bigarren zatian. Eguneko tenperatura 2 eta 4 º artean jaitsiko da.
Asteartean giro goibela eta euritsua izango dugu. Euri gehiena egunaren lehen partean egingo du, eta goizaldean trumoiak joko duenik ezin dugu baztertu. Arratsaldean atertzeko joera hartuko du. Ipar-mendebaldeko haizearekin eta hodei geruzarekin tenperaturak behera egingo du eta eguneko tenperatura epelenak 20 º-tik behera geratuko dira.