Gizartea -
Larunbatetik, desagertuta
Mendizale bat erreskatatu du Ertzaintzaren helikopteroak, Ibarrangelun
Gainera, larunbat goizean mendira joan zenetik Atxarteko zonaldean (Abadiño) desagertutako beste lagunaren bila daude Eusko Jaurlaritzako Larrialdiei Aurre Egiteko Zerbitzuetako kideak.
Erredakzioa
Ertzaintzaren helikoptero batek Portugaleteko mendizale bat erreskatatu du igande honetan, 11:00ak aldera, Akordako zonaldean, Ibarrangeluko udalerrian (Bizkaian). Mendian galduta zegoelakoan, gizonezkoak Larrialdietako Arreta Zerbitzura larunbat gauean deitu zuen. Ertzaintzaren mendi erreskateko talde bat bere bila egon zen gaueko 01:00ak arte, hura aurkitu gabe.
Igandeko lehen orduetan bilaketa lanei ekin diete berriro, orain helikoptero baten laguntzarekin. 09:00ak aldera, gizonezkoarekin telefonoz hitz egitea lortu dute eta azkenik, landaretza zarbatsu batean aurkitu zuten. Sarrera konplikatua zuenez, helikopteroz erreskatatu dute eta Herrizaingo Sailak jakitera eman duenez, egoera onean dago.
Abadiñon desagertutakoaren bilaketak jarraitzen du
Halaber, Atxarteko zonaldean (Abadiño) larunbat goizean mendira irten zenetik desagertutako beste lagun baten bilaketarekin jarraitzen dute Eusko Jaurlaritzako Larrialdiei Aurre Egiteko Zerbitzuetako kideek. Zonaldea arakatzen ari dira, momentuz, emaitzarik lortu gabe. Goizean zehar Ertzaintzako helikoptero bat ere gehitu da bilakete lanei, airetik miatzeko.