Gizartea -
Depresioak Atlantikotik
Larunbatera arte luzatu dute abisu horia, 110 km/h-ko boladak erregistratu ostean
Bihar ere abisu horia ezarriko dute, nabigaziorako arriskuagatik eta kostaldean izango duen inpaktuagatik. Donostiako Pasealeku Berria itxita egongo da ibilgailuen trafikoarentzat.
Agentziak | Erredakzioa
Eusko Jaurlaritzako Segurtasun Sailak larunbatera arte luzatu du abisu horia, 100 km/h-ko haize-boladak izan daitezkeelako. Azken orduetan, 110 km/h-ko boladak izan dira Matxitxakon, 104koak Oizen, 102koak Urduñan eta 89koak Zizurkilen.
Gaur abisu horia ezarri dute haizeagatik 18:00ak arte. Hego-osagaiko haize-boladek 100 km/h-ko abiadura gainditu dezakete haizeguneetan, batez ere Gipuzkoako mendietan. Toki babestuetan, berriz, haize-boladak 80 km/h-koak izan daitezke Bizkaian eta Gipuzkoan; Araban, berriz, 70-80 km/h-koak izatea espero da.
Bihar, 03:00etatik 15:00etara bitartean ezarriko dute abisua haizeagatik. Mendebaldeko eta ipar-mendebaldeko haize-boladek orduko 100 kilometroko abiadura gaindituko dute itsasertzeko haizeguneetan, eta 80-100ekoa mendi-eremuetan. Toki babestuetan, orduko 60-80 kilometroko boladak izan daitezke.
5 metrorainoko olatuak
Larunbatean ere, abisu horia aktibatuko dute, 06:00etatik eguna amaitu arte, nabigaziorako arriskuagatik; izan ere, olatu adierazgarrien altuera 3,5 metrotik 5 metro ingurura igotzea espero da. Arratsalde-gau partean, 4 edo 3,5 metroraino jaitsiko da.
Itsasaldeko arriskuagatik ezarriko duten abisua 13:00etatik 15:00etara izango da indarrean kostaldean. Itsasgora 13:55ean izango da, 4,56 metroko marearekin.
