Gizartea -
Zirkulazio istripua
22 urteko emakume bat hil da Sestaon, zihoan autoa bidetik aterata
Autoaren gidaria, 27 urteko gizon bat, atxilotu egin dute, positibo eman baitu alkoholemia eta estupefaziente kontrolean.
Erredakzioa
Emakumezko bat (22 urtekoa eta Barakaldoko bizilaguna) hil egin da gaur goizaldean, Sestaon (Bizkaia), zihoan autoa errepidetik aterata, Foruzaingoak jakinarazi duenez.
Ezbeharra 02:30ean gertatu da, BI-644 errepidean.
Autoaren gidaria (gizonezkoa, 27 urtekoa eta Barakaldoko bizilaguna) zauritu egin da eta Gurutzetako ospitalera eraman behar izan dute, baina handik eta ordu batzuetara eman diote senda-agiria.
Lehen ikerketen arabera, gidariak autoaren kontrola galdu du, espaloian igo eta talka egin du.
Hara bertaratu diren agenteek egiaztatu egin dute biktimak ez zuela jarrita segurtasun-uhala. Gainera, gidariak positibo eman du alkoholemia eta estupefaziente kontrolean, eta, beraz, atxilotu egin dute.
Gidaria Udaltzaingoaren komisarian dago. Izapideak bukatu ostean, epailearen esku utziko dute.
