Tokion haragi erradioaktiboa saldu izana onartu du enpresa batek

Japonian haragia saltzen duen bigarren enpresarik handienak, Aenon konpainiak, alegia, Tokion eta inguruko hainbat dendatan zesio erradioaktiboarekin kutsatutako behi haragia saldu izana onartu du komunikatu baten bitartez.

Idatziaren bitartez zehaztu dutenez, Tokioko denda batean eta Japoniako hiriburuaren inguruan dauden dozenaka dendetan saldu du aipatutako enpresak haragi kutsatua.

Behiak arrozez egindako pentsuarekin elikatzen dituzte eta pentsu horri Gobernuak ezarritako neurriak gainditzen dituen zesio erradioaktiboa atzeman diote.

Egoeraren aurrean, baliteke Japoniako agintariek Fukushimatik datorren behi haragiaren esportazioa eta komertzioa debekatzea, gaur Gobernuko iturri batzuek azaldu dutenez.

Aenon konpainiak egindako kalkuluen arabera, apirilaren 27tik ekainaren 20a bitartean 319 behi haragi kilo saldu dizute. Horiek Tokioko denda batean eta Kanagawa, Chiba, Shizuoka eta Ishikawa herrietako hainbat saltokitan banatu dituzte. Edozein kasutan, zin egin dute zehaztasunez frogatuko dutela banatzen duten haragiak edozein motatako kutsadurarik ote daukan.

Pasa den astean, Fukushima-1 zentraletik gertu dagoen Minami Somako granja batean baimenduko maila ia sei aldiz gainditzen zuten zesio erradioaktiboa atzeman zuten.

Osasunean arriskuak

Albistea jakindakoan sortu den alarmaren aurrean, Japoniako Nekazaritza ministroak esan du haragi kutsatua noizbehinka jateak gizakien osasunean ez daukala inolako eraginik.

Janari kutsatu gehiago

Fukushimako zentral nuklearreako istripua gertatu zenetik, Japonian dagoeneko hainbat elikagaietan atzeman dute erradiazioa, hala nola, barazkietan, tean, esnean, mariskoan edota urean.

Gogoratu behar da, zentral nuklearra martxoaren 11n inguru hori astindu zuen tsunamiaren ondorioz kaltetu dela Chernobilgo (Ukrainia) istripu nuklearra 1986an gertatu zenetik mundu mailako krisi nuklearrik latzena eraginez.