Gobernu Ordezkaritza martxa laikoa deitu dutenekin bildu da

Abuztuak 17ko martxa laikoa deitu duten elkarteak Gobernuko ordezkariekin bildu dira gaur, eta "aurrerapen oso garrantzitsuak" lortu dituzte; besteak beste, litekeena da martxa Tirso de Molinan hasi eta, "gutxienez", Puerta del Solen amaitzea.

Elkarte horietako arduradunak Ricardo Garcia Gobernuko ordezkariordearekin bildu dira, eta bilerako giroa oso ona izan dela esan dute biek. Ordezkariek mahaiaren gainean lau ibilbide jarri dituztela adierazi dute, "bi besteak baino hobeak" direla gaineratuta.

Gazte katolikoen biltzarra abuztuaren 16tik 21era bitartean emango da, Madrilen, eta Benedikto XVI.a izango da bertan, 18tik 21era.

Evaristo Villar Kristau Sareen arduradunak adierazi duenez, "akordio batera iritsiko gara, eta manifestazioak jarraitu egiten du, deituta dago eta jarraitzen du". Hark eta Luis Vegak gauzek normaltasunez aurrera egin behar duten iritzia dute, eta jendearentzat arazorik ez dagoen leku batean.

Lau ibilbideak osoko bilkuran eztabaidatuko dituzte gaur. Bertara, martxa defendatzen duten ehun plataforma eta elkarte baino gehiago deitu dituzte, denen artean hartutako erabaki bat hartzeko, Gobernuaren Ordezkaritzak behin betiko onartu baino lehen.