Gizartea -

Italia

Italiak 'Aita Mari' ontzia geldiarazi du, "irregulartasunak" egotzita

Erreskate-ontzian egindako ikuskapen batean "hainbat irregulartasun tekniko eta operatibo" atzeman dituzte, Italiako kostazainen arabera.

'Aita Mari ontziaren artxiboko irudi bat. EiTBren bideo batetik hartutako argazkia.
'Aita Mari ontziaren artxiboko irudi bat
'Aita Mari ontziaren artxiboko irudi bat. EiTBren bideo batetik hartutako argazkia.

Agentziak | Erredakzioa

Whatsapp Facebook Twitter Telegram Email

Italiako kostazainek Itsas Salbamendu Humanitarioa gobernuz kanpoko erakundearen 'Aita Mari' erreskate-ontzia geldiarazi dute, ontzian ikuskapena egin ondoren. Hain zuzen ere, bezperan 'Alan Kurdi' ontzia geldiarazi zuten Palermoko portuan, "irregulartasunak" egotzita.

"Gaur, Sea Eye gobernuz kanpoko erakundearen 'Alan Kurdi' ontzian egin zen bezala, Palermoko portuan dagoen 'Aita Mari' ontzian ikuskapena egin dute Italiako kostazainek, araudiak betetzen ari direla egiaztatzeko", azaldu dute ohar bidez kostazainek eurek.

Hala, agenteek adierazi dutenez, "nabigazioaren segurtasuna eta ingurumenaren babesa" bermatze aldera, ontzia "geldiarazi" egin dute; izan ere, "hainbat irregulartasun tekniko eta operatibo" atzeman dituzte, "tripulazioaren eta ontzian dauden pertsonen segurtasuna kolokan" jartzen dutenak.

Kostazainek gaineratu dutenez, itsasoa babesteko araudien zenbait urratze atzeman dituzte, asteartean, 'Alan Kurdi' ontzian egin zuten bezala.

"Atzemandako irregulartasunak tarteko, ontzia geldiarazita egongo da horiek zuzendu arte", Italiako kostazainen arabera, eta ikuskapena "Italiako portuetan dauden atzerriko ontzietan egin ohi diren segurtasun-kontrolen markoan dago", gaineratu dute.

Bi ontziak koronabirusaren pandemiaren testuinguruan geldiarazi dituzte. Pandemia dela eta, Italiak eta Maltak itxita dituzte portuak Mediterraneoan erreskatatutako migratzaileentzat.

Hau zure interesekoa bada, baliteke beste gai hauek ere izatea
Albisteak migrazioa EAE albisteak Gizartea Eguneko albisteak Albisteak Italiako albisteak Errefuxiatuak albisteak gaur Eskubide unibertsalak Gobernuz kanpoko erakundeen albisteak Aita Mariren azken ordukoa