Lopez de Uralderen aurkako epaia astelehenean jakingo da

Juan Lopez de Uralde Greenpeace Espainiako zuzendari ohiaren eta erakundeko beste kide batzuen aurkako epaia astelehenean,12:30ean, jakingo da, Greenpeace erakundeak jakitera eman duenez.

Auzipetuek autoen matrikulak eta afarira sartu ahal izateko paperak faltsutu zituztela errepikatu du Fiskaltzak. Horregatik, espetxe zigorrak eskatu ditu. Fiskaltzak 60 eguneko kartzela-zigorra eskatu du kide bakoitzarentzat, eta Greenpeace Nordic Norvegiako ordezkaritzarentzat, aldiz, 30.000 euroko izuna.

Greenpeace Nordic erakundeko 11 auzipetuei bizilekua bortxatzea, agiriak faltsutzea eta ordezkari publikoen lekuan jartzea leporatzen diete.

Era berean, erregina iraindu zutela aipatu du fiskalak, nahiz eta duela 80 urte erabili ez den akusazioa izan. Horregatik Danimarkako legelariek gogor kritikatu dute fiskala.

Juan Lopez de Uralde Greenpeace Espainiako zuzendari ohiak eta erakundeko beste kide batzuek euren absoluzioa eskatu zuten ekainean. 2009ko ingurugiro goi-bileraren ekitaldi ofizial batean sartu ziren eta horregatik epaiketa bati aurre egin behar izan zioten.

Prozesu judiziala eta auzipetuak aske uztea eskatu du defentsak, goi-bileran akordio bat behartzeko protesta politiko bat izan zela argudiatuta. Klima-aldaketaren ondorioek sortutako arazoak gero eta larriagoak dira eta nazioarteak ez du neurririk hartzen, ekintzaileen defentsak gogorarazi duenez.

Errugabeak direla adierazi dute auzipetuek, baina gertakarietan parte hartu zutela onartu dute. Goi-bilerak porrot egitea saihesteko ekintza justifikatu dute, izan ere, munduko buruzagiek ez zuten akordiorik lortu.