Gizartea -
Euskadin
Astelehenean irekiko dute 2020-2021 ikasturteko Lanbide Heziketako matrikulazio epea
Izena emateko bi aukera dauzkate ikasleek: aurrez aurrekoa, ikasketa zentroetan bertan, edo internet bidezkoa.
Agentziak | Erredakzioa
Lanbide Heziketako 2020-2021 ikasturterako izena emateko epea ekainaren 1ean, astelehena, zabalduko dute Euskadin eta hilaren 19an itxiko dute, Hezkuntza sailak aditzera emandakoaren arabera.
Interesa duten ikasleek bi aukera dituzte izena emateko: aurrez aurrekoa, zentroetan bertan, eta internet bidezkoa. Ikastetxeetan egiten diren izapideak idazkaritza orduetan egin beharko dituzte. Telematikoki egindako eskaerak, berriz, Hezkuntza saileko atarian egin beharko dira: www.euskadi.eus/educacion.
Uztailaren 7an behin-behineko zerrendak aterako dituzte, onartutako eta onartu gabeko ikasleekin. Hurrengo egunera arte erreklamazioak egiteko aukera izango da eta behin betiko zerrendak uztailaren 13an aterako dituzte. 13tik 17ra matrikula egiteko garaia izango da (bi egunak barne).
Urrutiko ikasketak egiteko aurre-matrikula ere ekainaren 9atik aurrera egin ahal izango da. BirtLH-ek (Lanbide Heziketako ikasketa birtual eta digitalizatuen zentroa) gradu ertain eta goi graduko ikasketak urrutitik egiteko aukera ematen du, modu semipresentzialean.
Eskaintza
Euskadin 186 ikastetxek emango dute Lanbide Heziketa ikasketak egiteko aukera 2020-2021 ikasturtean. Guztira, 136 titulazio ezberdin daude, 23 familia profesionaletakoak
2019-2020 ikasturtean 42.000 ikasle baino gehiago izan ditu Euskadiko Lanbide Heziketak.
