Gizartea -

BIZKAIA

Portugaleten okupatutako beste etxebizitza bat hustea lortu dute bizilagunek

Ordubete inguru egon dira etxearen aurrean, Errepelega auzoko okupen aurka oihuka, barruan zegoen pertsonak handik alde egitea erabaki duen arte.

Portugaleten hustarazi duten etxebizitza, Errepelega auzoan. Argazkia: Euskadi Irratia
Portugaleten hustarazi duten etxebizitza, Errepelega auzoan.
Bizilagunen presioak beste etxebizitza bat hustea lortu du Portugaleten

1:15

AGENTZIAK | ERREDAKZIOA

Whatsapp Facebook Twitter Telegram Email

Portugaleteko (Bizkaia) Errepelega auzoko Arantza kalean etxebizitza bat legez kanpo okupatzen zuen pertsona batek etxebizitza hustea erabaki du bart, etxearen aurrean elkartutako ehun bat bizilagunek eraikina uzteko eskatu ostean.

Bizilagunek auzo bereko beste etxebizitza bat hustea lortu zuten ordu batzuk lehenago. Horregatik, 22:00ak aldera Arantza kaleko 11 zenbakia duen atariaren aurrean elkartzea erabaki zuten. Alabaina, ezin izan ziren okupatutako etxebizitzara hurbildu, Ertzaintzaren segurtasun-dispositibo handi batek ingurua itxi baitzuen liskarrik ez izateko. Hala ere, tentsio uneak egon ziren manifestarien eta agenteen artean.

Bizilagunek ordubete inguru eman zuten etxe horren aurrean, Errepelega auzoko okupen aurka oihuka, 23:00ak aldera barruan zegoen pertsonak handik alde egitea erabaki zuen arte. Ertzaintzak jakinarazi duenez, ez zen istilurik egon pertsona horren eta inguruan bildutako bizilagunen artean.

Kasu honetan, Errepelega auzoko Arantza kalean goizean emakume bati indarrez egindako lapurreta batek eragin zuen protesta. Ustezko lapurra (geroago atxilotu zuten) etxe okupatuarekin lotuta egon daiteke, polizia-iturriek jakitera eman dutenez.

Asteazken gauean antzeko zerbait gertatu zen Bizkaiko udalerriko auzo berean, Federico Martinez kaleko pisu bat okupatzen zuten lau pertsonek etxebizitza hustea onartu baituten, etxe aurrean bildutako bizilagunen presioaren aurrean. Ertzaintzak etxebizitzatik irteten lagundu zien, istilurik ez izateko.

Portugaleteko Udalak etxebizitza horren sarrera itxi zuen, eta gauza bera egingo du bart gauean hustutako etxebizitzarekin, legez kanpo berriz okupatzea saihesteko.

Ildo horretatik, Mikel Torres Portugaleteko alkateak adierazi du okupen presentziak "ezinegona" eragin duela auzoan, eta bizilagunek "auzoan nahi ez dituztela esateko eta alde egiteko eskatzeko elkarretaratzea" egin zutela etxebizitzaren aurrean.

Hau zure interesekoa bada, baliteke beste gai hauek ere izatea
Ertzaintza Portugalete Bizkaia Delituak Salaketak Gizartea Eguneko albisteak Albisteak Lapurretak Etxebizitza Okupak