Celaak murrizketarik ez dela egongo ziurtatuz hasi du ikasturtea

Isabel Celaa Hezkuntza sailburuak 2011-2011 ikasturteari eman dio hasiera gaur Bergarako San Martin Aguirre eskolan eta Hezkuntza Sailean ez dela murrizketarik egongo ziurtatu du bertan.

Celaak azpimarratu du Eusko Jaurlaritzak esfortzu "handia" egin dutela hezkuntza publikoaren egoera hobetzeko eta irakasleen egonkortasuna sustatzeko. "Beste erkidego batzuetan nahiago dute hezkuntzako gastuak murriztu, baina Jaurlaritzaren erabaki politikoa da hezkuntza mailari eustea", gaineratu du.

Celaaren esanetan, legegintzaldian egin dituzten Lanpostu Publikoen Eskaintzek agerian utzi dute asmo hori, izan ere, epe horretan 3.064 irakasle funtzionario izatera pasa dira. 1994tik izan den LPE zabalena egin dute aurten, 1.462 irakaslerena hain zuzen ere.

Bestalde, ikasle kopuruak ere gora egin du. Hiru urtetik gorako 7.708 ikasle berri daude hezkuntza sisteman, eta horietako 5.701ek eskola publikoetara jo dute. Orotara, 349.590 ikasle daude eskoletan, iaz baino % 2,5 gehiago.

Hezkuntza hirueledunari dagokionez, 118 zentrotan banatutako 7.324 ikaslek eredu hori hautatu dutela esan du, hau da, aurreko urtean baino 3.867 gehiagok.

Eskola 2.0 proiektuaren baitan, beste 20.000 ordenagailu banatuko dituzte DBHko bigarren mailan.