Gizartea -
GERTAKARIAK
Espediente bat ireki diote Gasteizen boa bat paseatzen ari zen gizon bati
Sugea jabearekin zegoela aurkitu zuten, eta honek bizkarrean eta besoetan zeraman.
eitb.eus
Udaltzaingoak espediente bat ireki dio 32 urteko gizon bati, Gasteizko Arriaga parketik boa bat paseatzen ari zelako. 19:15 aldera, poliziak dei bat jaso zuen, parkean animalia hori ikusi zutela jakinarazteko. Bertaratu zen patruilak sugea jabearekin aurkitu zuen, eta honek bizkarrean eta besoetan zeraman.
Bi metro inguruko pastel koloreko boa hertsatzaile bat zen. Agenteek txip bat jarrita zuela eta CITES Fauna eta Flora Espezie Mehatxatuen Nazioarteko Merkataritzari buruzko Hitzarmenean zehaztu bezala erregistratuta zegoela egiaztatu zuten. Hala ere, jabeari sugearekin etxera joateko eskatu zioten.
Boaren dokumentazioa behar bezala dagoen egiaztatzeko, Ingurumen Unitatea harremanetan jarri da Osasun Publikoarekin eta CITESen administrazioarekin, baina Gasteizko Udaleko albaitariek adierazi dute jabeak araubide juridikoaren 50/99 Legea hautsi duela, arriskutsuak izan daitezkeen animalien erabilera zehazten duena; izan ere, horren arabera, jabeak dagokion lizentzia eduki behar du, eta, gainera, arriskutsuak izan daitezkeen animalien udal-erregistroan inskribatuta egon behar du. Bestalde, aztertzen ari dira ea animalia arriskutsu batekin kaletik ibiltzeak arau-hauste administratiboa dakarren.
Espedientea CITESen erantzunarekin osatu ondoren, Udalari bidaliko diote, izapidetu dezan. Bestalde, pertsona horrek etxean beste boa bat duen argitzeko ikerketa hasi du Udaltzaingoak.