Defentsoria Emakunden sartzeak 500.000 euro aurreztea ekarriko du

Emakumeen eta Gizonen Berdintasunerako Defentsa Erakundea Emakunden sartzeak urtero 500.000 euro aurreztea ahalbidetuko du. Maria Silvestre Emakundeko zuzendariak agerraldia egin du Eusko Legebiltzarreko Batzordean astelehen honetan, Defentsoria Emakunden erabat sartzea aurreikusten duen lege-egitasmoak Berdintasunerako Legean eragingo dituen aldaketez hitz egiteko.

Defentsoria herritarrak sexuagatiko bereizketen aurrean babesteko eta arlo pribatuan berdintasun printzipioa bultzatzeko erakundea da. Hasiera batetik, Emakunderen mendean egon da, eta aurrekontuei dagokienez horren mendekoa izan da, baina Silvestreren arabera, funtzio eta gastu batzuk bikoiztu egin dira eta horiek dira orain kendu nahi dituztenak. Legea aldatzeko proposamen horrekin, eta Legebiltzarrean bideratzen dutenean, Defentsa Erakundea Emakunden sartuko da eta langile teknikoen plantilla handitu egingo du horrela. Hala ere, Emakumearen Institutuko azpiegitura propioa izango du txostenak eta ikerketak egiteko, bikoizketarik sortu gabe.

Silvestrek azpimarratu duenez, integrazio honek Defentsa Erakundearen "eraginkortasuna" handitzea du helburu, eta ez hura desagerraraztea, eta horri esker, Administrazioak urtero 500.000 euro aurreztuko ditu.