EAEn eta Nafarroan abisu horian jarraitzen dute gaur, tenperatura altuengatik

Eusko Jaurlaritzako Segurtasun Sailak ostegun honetara arte luzatu du tenperatura altuengatik ezarritako abisu horia; izan ere, 36 ºC-ra irits baitaitezke.

Hain zuzen ere, abisu horia 15:00etatik 19:00etara egongo dira indarrean. Tarte horretan tenperatura maximoak 33-34 gradura iristea espero da kostaldean, eta 36 gradura iristea Kantauri barnealdean.

Trantsizio gunean eta Ebroko ardatzean 35 gradu inguruan egongo da merkurioa, Euskalmeten arabera, eta horrek hego haizea izango dela protagonista jardunaldi horietan adierazten du.

Gauzak horrela, gaur ere giro eguzkitsu nagusituko da, baina egunak aurrera egin ahala hodeiak ugaritzen joango dira eta arratsalde-gauean zerua estalita gera daiteke, bereziki mendebaldean.

Nafarroari dagokionez, asteazken honetan abisu horia ezarriko dute tenperatura altuengatik, 36 gradura irits daitezkeenak.

Ostiralean, ordea, hodei ugarirekin eta ipar partean euri pixka batekin hasiko dugu eguna. Arratsaldean bero-hodeiak garatuko dira eta baliteke ekaitzak jotzea, batez ere mendebaldean.

Hodeitzaren eta ipar-haizearen eraginez tenperatura dezente jaitsiko da iparraldean eta maximoak 25 ºC inguruan geratuko dira.

Nafarroa erdi eta hegoaldean haize aldaketa eta hodeiak beranduago iritsiko dira eta, horren ondorioz, tenperatura altua izango da berriz ere; 35 ºC inguruko maximoak neurtuko dira berriro.

Abisu horia kostaldean

Halaber, ostiral honetan, Segurtasun Sailak bi abisu hori ezarriko ditu kostaldean, itsasaldeko arriskuagatik.

Horietako lehena, nabigaziorako izango da lehen bi milietan, eta 12:00etatik 24:00etara egongo da indarrean, bi metro baino gehiagoko olatuak espero baitira.

Ildo horretatik, ipar-mendebaldeko hondoko itsasoak 1,5-2 metroko olatuak altxatuko ditu. Gainera, haizea iparraldekoa izango da; 3 indarrekoa eta 4 arteko tarteekin.

Bestalde, 18:00etatik 20:00etara bitartean beste abisu bat egongo da indarrean kostaldean, kasu honetan olatuen talka arriskuagatik. Hala, olatu esanguratsuaren altuera 2-2,5 metro ingurukoa izan daiteke.